सरकारचे कर्ज माफीवर नवीन धोरण

सरकारचे कर्ज माफीवर नवीन धोरण 

विधिमंडळाच्या एक दिवसीय विशेष अधिवेशनाची सुरुवात राज्यपालांच्या अभिभाषणाने झाली. विधिमंडळाच्या मध्यवर्ती सभागृहात झालेल्या या अभिभाषणास विधान परिषद सभापती रामराजे नाईक निंबाळकर, विधानसभा अध्यक्ष नाना पटोले, मुख्यमंत्री उद्धव ठाकरे, उपसभापती डॉ. निलम गोऱ्हे, उपमुख्यमंत्री अजित पवार, मंत्रिमंडळातील सदस्य, विरोधी पक्षनेते प्रवीण दरेकर, देवेंद्र फडणवीस यांच्यासह विधिमंडळाच्या उभय सभागृहांचे आमदार उपस्थित होते.
महाराष्ट्राच्या निर्मितीचे हे साठावे वर्ष असून, संयुक्त महाराष्ट्राच्या लढ्यातील हुतात्म्यांना श्रद्धांजली अर्पण करीत राज्यपाल म्हणाले की, गेल्या ६० वर्षांत कृषी, उद्योग, तंत्रज्ञान, कला, क्रीडा, संगीत, शिक्षण आदी विविध क्षेत्रांमध्ये उल्लेखनीय प्रगती राज्याने केली आहे. या कामगिरीचा सोहळा विविध कार्यक्रमांच्या माध्यमातून केला जाईल. सीमा भागांतील ८६५ गावांत राहणाऱ्या मराठी भाषक जनतेच्या हक्कांचे व विशेषाधिकारांचे संरक्षण करण्याचा पुनरुच्चार राज्यपालांनी यावेळी केला. मराठी रंगभूमी चळवळीला १७५ वर्षे पूर्ण झाली असून, त्यानिमित्त मुंबईत या चळवळीचा इतिहास साकारणारे संग्रहालय सुरू करण्यात येईल, असे राज्यपालांनी स्पष्ट केले. 

शेतकऱ्यांना दोन लाख रुपयांपर्यंतचे कर्ज माफ करण्याच्या योजनेची व्याप्ती वाढविण्याचा सरकारचा मानस असून, पीक कर्जाची परतफेड वेळेवर करणाऱ्या शेतकऱ्यांना उत्तेजन देण्यासाठी सवलती देण्याचा लवकरच निर्णय होईल. तसेच मराठी रंगभूमीच्या चळवळीस १७५ वर्षे पूर्ण झाल्याने मुंबईत मराठी रंगभूमी चळवळीचा इतिहास साकार करणारे संग्रहालय स्थापन करण्यात येईल, अशी ग्वाही सरकारतर्फे राज्यपाल भगत सिंह कोश्यारी यांनी बुधवारी राज्य विधिमंडळाच्या संयुक्त सभागृहात अभिभाषण करताना दिली.

छत्रपती शिवाजी महाराज, महात्मा जोतिराव फुले, राजर्षी शाहू महाराज, भारतरत्न डॉ. बाबासाहेब आंबेडकर यांच्यासारख्या महान द्रष्ट्या समाजसुधारकांनी घालून दिलेल्या मार्गाचे अनुसरण करून समाजातील वंचित घटकांचा विकास करण्यात येईल. तसेच महिलांच्या सुरक्षेसाठी प्रभावी उपाययोजना करतानाच, महिलांच्या संदर्भातील गुन्ह्यांबाबत तातडीने कठोर कारवाई करण्यात येईल. तसेच आवश्यकता वाटल्यास कायद्यामध्ये सुधारणा करण्यात येईल. नाशिक, ठाणे, अमरावती व नागपूर येथे आदिवासी युवकांसाठी क्रीडा अकादमी सुरू करण्यात येईल, असे राज्यपाल कोश्यारी यांनी सांगितले.


शिवभोजन योजनेच्या माध्यमातून गरीब, गरजूंना केवळ १० रुपयांमध्ये चौरस आहार देण्यात येईल. बळीराजाला सहाय्य करण्यासाठी महात्मा जोतिराव फुले शेतकरी कर्जमुक्ती योजनेद्वारे दोन लाख रुपयांपर्यंतचे थकित कर्ज माफ करण्यात येणार आहे. पीक कर्जाची थकीत रक्कम दोन लाख रुपयांहून अधिक असलेल्या शेतकऱ्यांसाठी योजना तयार करण्यात येत असून, त्यास अंतिम रुप देण्यात येत आहे. पीक कर्जाची वेळेवर परतफेड करणाऱ्या शेतकऱ्यांना उत्तेजन देणाऱ्या लवकर नवीन योजना जाहीर केली जाईल, असेही त्यांनी सांगितले.


राज्यातील तीर्थस्थळांचा विकास कार्यक्रम हाती घेण्यात येणार आहे. अनेक भाविक शिर्डी येथे पदयात्रा करतात. पहिल्या टप्यात मुंबई ते शिर्डी या मार्गावर शौचालय, पिण्याचे पाणी अशा मूलभूत सुविधा यात्रेकरूंना पुरविण्यात येतील, असे ते म्हणाले. अभिभाषणाची सुरुवात तसेच समारोप राष्ट्रगीताने करण्यात आला.




About Gosip4U

Gosip4U is the digital wing of india - India's leading media and communications group with its interests spanning across country.

0 comments:

Post a Comment

Please add comment