आदित्य ठाकरे यांचा अनुभव किती आहे हे पाहण्यापेक्षा त्यांचं काम बघा:रोहित पवार

आदित्य ठाकरे यांचा अनुभव किती आहे हे पाहण्यापेक्षा त्यांचं काम बघा

राज्यात महाविकास आघाडीची सत्ता आल्यापासून भाजपचे नेते ठाकरे कुटुंबाला सातत्यानं लक्ष्य करताना दिसत आहेत. नाशिक येथे रविवारी पत्रकारांशी बोलताना चंद्रकांत पाटील यांनी 'सामना'च्या संपादकपदावरून ठाकरेंना टोला हाणला होता. 'कोणताही अनुभव नसताना मुलाला कॅबिनेट मंत्रीपद दिलं. आता रश्मी ठाकरे यांना 'सामना'चं संपादकपद दिलं. ठाकरे आता सगळंच घेऊ लागलेत,' असं पाटील म्हणाले होते. पाटील यांच्या या टीकेला रोहित पवार यांनी ट्विटरच्या माध्यमातून सणसणीत उत्तर दिलं आहे.

आदित्य ठाकरे यांचा अनुभव किती आहे हे पाहण्यापेक्षा त्यांचं काम बघा,' अशा शब्दांत राष्ट्रवादी काँग्रेसचे कर्जत-जामखेडचे आमदार रोहित पवार यांनी भाजपचे प्रदेशाध्यक्ष चंद्रकांत पाटील यांना सुनावलं आहे.

'आदित्य ठाकरेंच्या अनुभवापेक्षा त्यांचं काम बघा. एकमेकांची उणीदुणी काढण्यापेक्षा जबाबदार विरोधकाची भूमिका तुम्ही पार पाडू शकता,' असं रोहित पवार यांनी ट्विटमध्ये म्हटलं आहे. 'भाजपच्या सत्ताकाळात मंत्रिपदाचाही अनुभव नसलेल्या एका व्यक्तीला थेट मुख्यमंत्रीपद मिळालं होतं. त्या अनुभवाबद्दल तर तुम्हाला बोलायचं नाही ना,' असा चिमटाही रोहित यांनी चंद्रकांत पाटलांना काढला आहे.
मुंबई महापालिकेत दुसऱ्या क्रमांकाचा पक्ष होण्याचं मिशन राष्ट्रवादी काँग्रेसनं जाहीर केलं आहे. त्यावर भाजपचे आमदार आशिष शेलार यांनी खोचक टीका केली होती. त्यालाही रोहित यांनी उत्तर दिलं आहे. 'भारतीय जनता पक्षाचे सुरुवातीला केवळ दोन खासदार होते. त्याच पक्षाची आज केंद्रात सत्ता आहे. भाजपला आलेले हे 'अच्छे दिन' निष्ठावंत कार्यकर्त्यांमुळे आहेत आणि राज्यात भाजपला आलेले 'बुरे दिन' पक्षाच्या नेत्यांच्या अहंकाराचं फळ आहे,' असं रोहित यांनी दुसऱ्या एका ट्विटमध्ये म्हटलं आहे.




About Gosip4U

Gosip4U is the digital wing of india - India's leading media and communications group with its interests spanning across country.

0 comments:

Post a Comment

Please add comment