निलंबित केलेल्या डॉक्टरचे निलंबन मागे

निलंबित  केलेल्या डॉक्टरचे  निलंबन मागे 

पालकमंत्री संजय राठोड यांनी रुग्णाच्या प्रकृतीबद्दल विचारणा करण्यासाठी केलेल्या संपर्काला प्रतिसाद न दिल्याने वसंतराव नाईक शासकीय वैद्यकीय महाविद्यालयातील एका डॉक्टरला एक आठवड्यासाठी निलंबित करण्यात आले आहे. वैद्यकीय महाविद्यालयाचे अधिष्ठाता डॉ. मिलिंद कांबळे यांनी मंत्र्यांच्या सूचनेवरून ही कारवाई केली. दरम्यान संबंधित डॉक्टरने व डॉक्टरांच्या शिष्टमंडळाने याबाबत माफी मागितल्याने आता ही कारवाई मागे घेण्यात येणार असल्याची माहिती आहे.

वैद्यकीय महाविद्यालयाच्या बाह्यरुग्ण व अपघात विभागात दोन दिवसांपूर्वी एकाला दाखल करण्यात आले होते. या रुग्णाच्या एका परिचिताने वॉर्डात कार्यरत डॉक्टरला संपर्क साधला व 'भाऊ बोलणार आहेत..' असे सांगितले. वॉर्डात कार्यरत डॉक्टरने त्यावेळी 'भाऊ' म्हणजेच पालकमंत्री संजय राठोड यांच्याशी बोलणे टाळले. व असभ्य वर्तन केल्याचा आरोप होत आहे. त्यामुळे राठोड यांनी संबंधित डॉक्टर रुग्णांशी कसे वागतात याची कल्पना आल्याचे नमूद करीत कारवाई करण्याचे आदेश अधिष्ठाता डॉ. कांबळे यांना दिलेत. डॉ. कांबळे यांनी तातडीने संबंधित डॉक्टरला आठ दिवसांसाठी निलंबित करण्यात येत असल्याचा आदेश बजावला. दरम्यान गुरुवारी संबंधित डॉक्टर व डॉक्टरांच्या संघटनेने डॉ. कांबळे यांची भेट घेतली. चूक झाल्याचे मान्य करीत डॉक्टर व संघटनेने माफी मागितली. त्यामुळे झाल्या प्रकारावर पडदा पडणार असल्याचे संकेत आहेत. रुग्ण, त्यांचे नातेवाईक, लोकप्रतिनिधी यांच्याशी सौजन्यानेच वागा, असे निर्देश यानिमित्ताने पुन्हा एकदा अधिष्ठाता डॉ. कांबळे यांनी सर्व विभागातील अधिकारी, कर्मचाऱ्यांना दिले आहेत.




About Gosip4U

Gosip4U is the digital wing of india - India's leading media and communications group with its interests spanning across country.

0 comments:

Post a Comment

Please add comment