फडणवीसांना चौकशीसाठी बोलवण्याची मागणी

फडणवीसांना चौकशीसाठी बोलवण्याची मागणी
पुणे जिल्ह्यातील कोरेगाव-भीमा हिंसाचारानंतर तत्कालीन मुख्यमंत्री व गृहमंत्री देवेंद्र फडणवी यांनी विधिमंडळ अधिवेशनात निवेदन केले होते. त्यात हिंसाचारामागे समस्त हिंदू आघाडीचे संस्थापक अध्यक्ष मिलिंद एकबोटे व शिव प्रतिष्ठानचे संस्थापक अध्यक्ष संभाजी भिडे यांचा हात असल्याची माहिती देण्यात आली होती. त्यामुळे सत्य बाहेर येण्यासाठी फडणवीस यांना चौकशीसाठी बोलावण्यात यावे', असा अर्ज कर्मवीर प्रतिष्ठानचे अध्यक्ष व सामाजिक कार्यकर्ते डॉ. संजय लाखे-पाटील यांनी कोरेगाव-भीमा चौकशी आयोगाकडे केला आहे.
'फडणवीस यांनी त्यावेळी विधिमंडळाच्या दोन्ही सभागृहांत केलेले निवेदन हे त्यांना पोलिसांकडून मिळालेल्या अधिकृत माहितीच्या आधारे होते. तरीही दलितांविरुद्ध झालेल्या हिंसाचाराच्या खऱ्या सूत्रधारांविरोधात पोलिसांनी तपास केलेला दिसत नाही. त्याउलट पुणे पोलिसांनी या हिंसाचारप्रकरणी शहरी नक्षलवादाच्या नावाखाली प्राध्यापक, सामाजिक कार्यकर्त्यांवर कारवाई केल्याचे दिसते. हिंसाचार व दंगलीच्या घटनेमागील सत्य शोधण्याच्या हेतूने चौकशी आयोगाने आतापर्यंत अनेकांना पाचारण केले. जोगेंद्र कवाडे यांनीही आयोगासमोर आपले म्हणणे नोंदवताना हिंसाचारामागील खऱ्या सूत्रधारांना अभय दिले जात असल्याचे नमूद केले होते. यामुळे सत्य बाहेर येण्यासाठी फडणवीस यांनाही चौकशीसाठी पाचारण करणे आवश्यक आहे. त्याचबरोबर हिंसाचाराच्या वेळी उपस्थित असलेले आणि त्यात जखमी झालेले पोलिस अधीक्षक व अन्य संबंधित पोलिसांनाही पाचारण करणे आवश्यक आहे', असे म्हणणे लाखे-पाटील यांनी अर्जात मांडले आहे. तसेच या अर्जावर तातडीने बुधवारी (आज) सुनावणी घ्यावी, अशी विनंतीही त्यांनी अर्जात केली आहे.




About Gosip4U

Gosip4U is the digital wing of india - India's leading media and communications group with its interests spanning across country.

0 comments:

Post a Comment

Please add comment